(வெருளி நோய்கள் 1061-1065: இலக்குவனார் திருவள்ளுவன்)

வெருளி நோய்கள் 1066-1070

  1. சீமை எலி வெருளி – Indikochoiridiophobia

கினி எலி என அழைக்கப்பெறும் சீமை எலி தொடர்பான அளவுகடந்த பேரச்சம் சீமை எலி வெருளி.
ஆங்கிலத்தில் இதன் தோற்றத்தைப் பார்த்து கினி பன்றி(guinea pig) என்கின்றனர். Guiné என்னும் கிழக்கு ஆப்பிரிக்க மக்கள் இனத்தைக் குறிக்கும் போர்த்துக்கீசியச் சொல்லில் இருந்து கினி(யா) நாட்டிற்குப் பெயர் வந்தது. ஆனால் இந்நாட்டிற்கும் இவ்வுயிரிக்கும் தொடர்பு இல்லை. ஆண்டெசு(Andes) நாடே இவற்றின் பிறப்பிடம்.
அதுபோல் இதற்கும் பன்றி இனத்திற்கும் தொடர்பில்லை. கொறிக்கும் விலங்குவகையைச் சார்ந்த இதைத் தமிழில் உருவ அடிப்படையில் எலி எனக் குறிக்கின்றனர். இயல்பான எலியிலிருந்து வேறுபடுத்த வெள்ளெலி என்றும் கினி எலி என்றும் கூறுகின்றனர். வெள்ளெலி(Hamster) எனத் தனிவகை இருப்பதால் அவ்வாறு அழைத்தால் குழப்பம் வரும். சீமை எலி எனக் கலைச் சொல்லகராதியில் குறித்துள்ளது. வேறு பெயர் கிடைக்கும்வரை நாமும் சீமை எலி என்றே சொல்லலாம்.
00

  1. சீன வெருளி-Chinophobia /Sinophobia

சீனா தொடர்பான தேவையற்ற வெறுப்பும் அளவுகடந்த பேரச்சமும் சீன வெருளி.
பெரும்பாலும் அமெரிக்கர்களில் ஒரு சாராருக்கும் தலாய்லாமாவின் தலைமையை ஏற்றுக் கொண்டவர்களிடையேயும், திபேத்து, ஆங்காங்கு முதலான நாட்டினரில் ஒரு பகுதியினருக்கும் முதலாளித்துவ நாடுகளிலும் சீனாவால் பாதிப்புற்ற நாட்டினரிடமும் சீனமக்கள், சீனப் பொருள்கள் முதலானவை மீது தேவையற்ற வெறுப்பும் பேரச்சமும் உள்ளன.
வண்ணக்கிளி என்னும் திரைப்படத்தில் வரும், “சின்னப்பாப்பா எங்கள் செல்லப்பாப்பா” என்னும் பாடலில்
“சிலுக்குச் சட்டை சீனா பொம்மை பலூன் வேணுமா” என ஒரு வரி வரும். அதற்கு முன்னரும் சீனப் பொம்மை பாடல்களில் இடம் பெற்றுள்ளது. நெடுங்காலமாகவே சீனப்பொருள்கள் மலிவு விலையில் நம் நாட்டில் விற்கப்படுகின்றன. இதன் காரணமாக நாட்டுப்பொருள் உற்பத்தியாளர்களுக்கும் விற்பனையாளர்களுக்கும் சீனப் பொருள் என்றாலே வெறுப்பும் அச்சமும் ஏற்படுவது இயல்புதான்.
00

  1. சுக்கான் வெருளி – Volanphobia

சுக்கான் / சக்கரத் திருப்பி (steering wheel/driving wheel/hand wheel) குறித்த வரம்பற்ற பேரச்சம் சுக்கான் வெருளி.
கப்பலில் பயன்படும் திருப்பியைச் சுக்கான் என்பதால் ஊர்தியில் உள்ள திருப்பியையும் சுக்கான் எனலாம்.
Volan என்னும் உருமானியச் சொல்லிற்குச் சுக்கான் எனப் பொருள்.
00

  1. சுடு பான வெருளி – Hygrothermophobia

சூடானபானங்கள் தொடர்பான அளவுகடந்த பேரச்சம் சுடு பான வெருளி.
சூடான பானங்கள் வாயில் புண்ணை உண்டாக்கும், குடலைப் பாதிக்கும், வயிற்றைப் பாதிக்கும் என்றும் அளவுகடந்த கவலை கொள்கின்றனர். மேலும், “பானங்களை மிகவும் சூடாக அருந்தினால் உணவுக்குழாயில் புற்றுநோய் ஏற்பட்ட வாய்ப்புள்ளது” என ஐ.நா. அமைப்பு எச்சரிக்கை விடுத்துள்ளது. இதுபோன்ற செய்திகளைப் படித்தவர்கள் அளவுகடந்த அச்சத்திற்கு ஆட்படுத்திக் கொள்கின்றனர்.
00

  1. சுடுகருவி வெருளி-Hoplophobia

துப்பாக்கி அல்லது துமுக்கி எனப்படும் வேட்டகம், சுடுகலன், முதலியன் மீது ஏற்படும் அளவுகடந்த பேரச்சம் சுடுகருவி வெருளி.
சுடுகருவிகளால் தாங்களோ குடும்பத்தினரோ அறிந்தவர்களோ பாதிக்கப்பட்டிருந்தால் அல்லது பிறர் உயிரிழந்ததைக் காணவோ அறியவோ நேர்ந்திருந்தால் இவற்றால் தமக்கும் குடும்பத்தாருக்கும் அழிவு வரும என்று பேரச்சம் கொண்டிருப்பர். எங்கிருந்தோ சுடுகருவி ஒலி கேட்டாலும் நடுக்குறுவர். சுடுகருவிப்படங்கள், சுடுகருவிகள் பயன்படுத்தப்படும நாகங்கள், திரைக்காட்சிகள் ஆகியவற்றைக் காணல், இவை தொடரபான கதை, கட்டுரைகளைப் படித்தல் போன்றவற்றால் அளவுகடந்த பேரச்சம் கொண்டு பாதிப்புறுவர்.
hoplites என்னும் கிரேக்கச் சொல்லின் பொருள் படைக்கருவி.
00

(தொடரும்)
இலக்குவனார் திருவள்ளுவன்
வெருளி அறிவியல் 2/5