(வெருளி நோய்கள் 431-435 : தொடர்ச்சி)

வெருளி நோய்கள் 436-440

  1. உருப்படவெருளி – Iconophobia

உருப்படம்(icon) குறித்த வரம்பற்ற பேரச்சம் உருப்படவெருளி.
இவற்றுள் குறிப்பாக மதச் சின்னங்கள் மீதான ஒரு வலுவான வெறுப்பு அல்லது பேரச்சம் இருக்கும். உருவ வழிபாட்டாளர்களை, கடவுள் உருவ எதிர்ப்பாளர்களை எதிர்க்கும் உருவ எதிர்ப்பு நிலைக்கு மாறுபட்டது. எனினும் உருவப்பட வெருளி, உருவ எதிர்ப்பு நிலைக்குக் கொண்டு செல்லலாம்.
மேலும் இஃது உருவ நேயர்களுக்கு எதிரானநிலைப்பாடாகும்.

  1. உருப்பொருள் வெருளி – Objectshowphobia

உருப்பொருள்கள் மீதான அளவுகடந்த பேரச்சம் உருப்பொருள் வெருளி.
அசைவூட்டப்படங்கள் அல்லது கேலிப்படங்களில் பயன்படுத்தும் வகையில் ஆயிரக்கணக்கில் உருப்பொருள்கள் உள்ளன. இவற்றின்மீதான பேரச்சமே உருப்பொருள் வெருளி.
சில இடங்களில் பொருட்காட்சி வெருளியையும் ஆடற்காட்சி வெருளியையும் Objectshowphobia என்றே குறிக்கின்றனர். எனினும் முதன்மையாக இஃது உருப்பொருள் வெருளியையே குறிக்கிறது.
00

  1. உருமு வெருளி – Brontophobia / Ceraunophobia

இடி மின்னல் கண்டு அளவுகடந்த பேரச்சம் கொள்வது உருமு வெருளி.

பொதுவாகச் சிறாரிடம் இவ்வெருளி தோன்றுகிறது. பலர் அகவை கூடும் பொழுது இவ்வெருளியில் குறைந்து காணப்படுகின்றனர். சிலர் எவ்வகை மாற்றமுமில்லாமல் இவ்வெருளியால் துன்புறுகின்றனர்.
வானிலை மாற்றத்தால் துயரம் வரும் வாய்ப்பு இல்லாத பொழுதும் அல்லது குறைந்த அளவு துன்பம் வரும் என்று அறிய நேர்ந்த பொழுதும், அவற்றிலிருந்து தற்காத்துக் கொள்ள வழி யிருந்தும், மிகப்பேரிடராகக் கற்பித்துக் கொண்டு அளவுகடந்த பேரச்சம் கொள்வர்.
விலங்கினம், பறவையினங்களுக்கும் இத்தகைய வெருளி வரும் என்கின்றனர்.

இடியைக் குறிக்கும் மற்றொரு சொல் உருமு.

இடிப்பதால் வரும் ஓசை:

“பாசவல் இடிக்கும் இருங் காழ் உலக்கைக் கடிது இடி வெரீஇய வெண் குருகு” (அகநானூறு:141:18-9) என்னும் பாடலில் நக்கீரர், அவல் குற்றும் உலக்கையின் இடி ஓசைகேட்டு பேரிடிபோல் கருதி அஞ்சும் நிறைந்த சூலினை உடைய வெண்குருகு பற்றிக் கூறுகிறார்.
“கடிது இடி உருமின் பம்பு பை அவிய
இடியொடு மயங்கி இனிது வீழ்ந்தன்றே” (குறுந்தொகை:391:3-4)
என்னும் பாடலடியில் பொன்மணியார் இடியுடன் கலந்து இனிதாக மழை பெய்த பொழுது விரைந்து வரும் இடியோசையால் பாம்பு அஞ்சுவதைக் குறிப்பிடுகிறார்.
“இடி ஓசை கேட்ட நாகம் போல” என்னும் உவமையும் இடிக்குப்பாம்பு அஞ்சுவதைக் குறிப்பிடுகிறது.
பாம்பின் உருமுவெருளி குறித்த பல குறிப்புகள் உள்ளன.
எனவே பிற உயிரினங்களுக்கும் உருமு(இடி) வெருளி வரும் என்பதை அன்றே தமிழர்கள் உணர்ந்திருந்தனர் எனலாம்.

bronte என்னும் கிரேக்கச்சொல்லின் பொருள் இடி.
astrape என்பதற்கு மின்னல் எனப் பொருள்.
Cerauno என்னும் கிரேக்கச் சொல்லின் பொருள் இடி, மின்னல்.

00

  1. உருளப்ப வெருளி -Rigatoniphobia

உருளப்பம் (rigatoni/tube-shaped pasta) தொடர்பான அளவுகடந்த பேரச்சம் உருளப்ப வெருளி.
rigatoni என்பது என்னும் இத்தாலியச் சொல்லிலிருந்து உருவானது. இதன் பொருள்,கோடிட்டது/வரி என்பன. எனினும் இங்கே உருள் வடிவமான இத்தாலிய உணவு வகை ஒன்றின் பெயரைக் குறிக்கிறது.
இத்தாலிய உணவு வகைகளை விரும்புபவர்கள்கூட, உருளப்பம் உடல் நலனுக்குக் கேடு தரும் எனச் சிலர் கூறுவதைக் கேள்வியுறுவதால் இதன் மீது அளவு கடந்த பேரச்சம் கொள்கின்றனர்.
00

  1. உருளி ஓட வெருளி – Veloxrotaphobia

உருளி ஓடம் (roller coaster) தொடர்பான அளவுகடந்த பேரச்சம் உருளி ஓட வெருளி.
தண்ணீரிலும் தரைக்கு மேலும் சுழன்று உருண்டு செல்லும் பொழுதுபோக்கு வண்டியான இதனை உருளி ஓடம் எனலாம்.
விரைவாக உருண்டோடும் சக்கரம் உடைய விளையாட்டு வண்டியைக் குறிப்பிடுவதால், இதனை உருளி ஓடம் எனலாம். உருளி தரையில் இயங்கவும் ஓடம் நீரில் இயங்கவும் உதவுகின்றன.
விரைவாக இயங்குவதாலும் நிலத்திலும் நீரிலும் மாறி மாறி இயங்குவதாலும் மிகு அச்சம் கொள்கின்றனர்.
vēlōx என்னும் இலத்தீன் சொல்லிற்கு விரைவு/வேகம் எனப் பொருள்.
rota என்னும் இலத்தீன் சொல்லின் பொருள் சக்கரம்.
00

(தொடரும்)

இலக்குவனார் திருவள்ளுவன்,

வெருளி அறிவியல் தொகுதி 1/5