எழிலரசி அல்லது காதலின் வெற்றி 8 – பேரா.சி.இலக்குவனார்

குற்றமொன் றில்லாக் குறுந்தொழில் புரியும்

எழிலர சிக்கோ ரிடுக்கணும் விளைத்தனர்

எண்ணிய விளையும் இனிது முடித்திலர்

துன்பக் கடலில் தோயப் புகுந்தனர்

அறிவை யிழந்தனர் ஆண்மை குன்றினர்

வாட்கிரை யான மகனை யாங்கே

பறந்திடும் புட்கும் பாய்ந்திடும் நரிக்கும்

இரையாய்க் கிடத்தி யேகினர். இல்லம்

அடைந்தது மாங்கே அவனைச் சேணிடை

அவ்வித மனுப்பல் அமைந்த தாகலின்

எவ்வித வியப்பும் எய்திலர் எவரும்

சென்றன பலநாள் கண்டில ளவனைப்

பலநாட் டங்கிய பான்மை நோக்கி,

அண்மையி லீன்ற ஆவொன் றதனின்,

கன்றினைப் பிரிந்து கலங்குதல் போலக்

காதலன்வருகை காணாக் காதலி

உள்ளம் புழுங்கினள்; ஒருநொடி அவனைப்

தம்முனோர்க் குறுகித் தாழ்ந்த குரலில்

நாணம் மிக்கு நாத்தடு மாறிச்

“சென்றஆ டலனேன் இன்னும் வந்திலன்?

உழைத்தற் கஞ்சி ஒடியொளிந் தனனோ?

கவர்ந்திட எண்ணிக் கரந்து திரிவனோ?

கள்வர் கூடிக் காதிட் டனரோ

மாற்றர் திரண்டு வழிமறித் தனரோ?

கள்வரும் காணின் நல்லவ ராகுவர்

சென்றோ னைப்பின் தேடிலீர் போலும்

நாடிக் கொணர்மின் நயப்புட னவனை”

என்று வேண்டினள்; நன்று நன்று

நாளை வருவன்; நலித லெதற்கு”

(எழில் கூடும்)

பேராசிரியர் முனைவர் சி.இலக்குவனார்

(வித்துவான் படிப்பு மாணாக்கனாக இருந்த பொழுது

படைத்த தனித்தமிழ்ப் பாவியம்.)

பேராசிரியர் சி.இலக்குவனார்