திருக்குறள் அறுசொல் உரை – 065. சொல்வன்மை: வெ. அரங்கராசன்
(அதிகாரம் 064. அமைச்சு தொடர்ச்சி)
02. பொருள் பால்
06. அமைச்சு இயல்
அதிகாரம் 065. சொல்வன்மை
கேட்பார் உள்ளம் கொள்ளும்படி,
சொற்களைச் சொல்லும் வல்லமை.
- நாநலம் என்னும் நலன்உடைமை, அந்நலம்,
யாநலத்(து) உள்ளதூஉம் அன்று.
எல்லாத் திறன்களுள்ளும் மிகச்சிறந்த
வெல்திறன் பேச்சுத் திறனே.
- ஆக்கமும், கேடும், அதனால் வருதலால்,
காத்(து)ஓம்பல் சொல்லின்கண் சோர்வு.
வளர்ச்சியும், வீழ்ச்சியும், தரும்பேச்சைத்,
தவறு இல்லாது பேசுக.
- கேட்டார்ப் பிணிக்கும் தகையவாய்க், கேளாரும்
வேட்ப மொழிவ(து)ஆம் சொல்.
கேட்டாரையும் கவர்ந்து, கேளாரையும்,
கேட்கத் தூண்டும்படி, பேசுக.
- திறன்அறிந்து சொல்லுக, சொல்லை; அறனும்,
பொருளும், அதனி(ன்)ஊங்(கு) இல்.
கேட்பார்திறன், சொல்திறன் ஆராய்ந்து
பேசினால், அறம்பொருள் சிறக்கும்.
- சொல்லுக சொல்லைப், பிறி(து)ஓர்சொல், அச்சொல்லை
வெல்லும்சொல் இன்மை அறிந்து.
வெல்லும்சொல் இல்லாதபடி, ஆராய்ந்து,
வெல்லும்படி சொல்லைச் சொல்லுக
- வேட்பத்,தாம் சொல்லிப், பிறர்சொல் பயன்கோடல்,
மாட்சியின் மா(சு)அற்றார் கோள்.
அறிஞர், விரும்பும்படி பேசுவர்;
பிறர்பேச்சையும் கேட்டுக் கொள்வர்.
.
- சொலல்வல்லன், சோர்(வு)இலன், அஞ்சான், அவனை
இகல்வெல்லல் யார்க்கும் அரிது.
சொல்வல்லமை, உளறாமை, அஞ்சாமை,
உள்ளார், சொல்வதில் வெல்வார்.
- விரைந்து தொழில்கேட்கும் ஞாலம், நிரந்(து),இனிது
சொல்லுதல் வல்லார்ப் பெறின்.
நிரலாய்ச் சொலவல்லார் இன்சொல்லை,
உலகார் எல்லாரும் பின்பற்றுவார்.
- பலசொல்லக் காம்உறுவர் மன்ற, மா(சு)அற்ற
சிலசொல்லல் தேற்றா தவர்.
சிலசொற்களில் நல்லதைச் சொல்லாதார்,
பலசொற்களில் சொல்ல விரும்புவார்.
- இணர்ஊழ்த்தும் நாறா மலர்அனையர், கற்ற(து)
உணர விரித்(து)உரையா தார்
படித்ததை விரித்துச் சொல்லற்கு
முடியாதார், மணம்இல்லா மலர்.
- பேராசிரியர் வெ. அரங்கராசன்
Leave a Reply