திருக்குறள் அறுசொல் உரை – 095. மருந்து : வெ. அரங்கராசன்
(அதிகாரம் 094. சூது தொடர்ச்சி)
02. பொருள் பால்
12. துன்ப இயல்
அதிகாரம் 095. மருந்து
நோய்கள் வரும்முன் காக்கும்,
வந்தால், நீக்கும் மருத்துவம்.
- மிகினும், குறையினும் நோய்செய்யும், நூலோர்
வளிமுதலா எண்ணிய மூன்று.
உடல்சூடு, குளிர்ச்சி, காற்று,
நிறையினும், குறையினும் நோயே.
- ”மருந்(து)”என வேண்டாஆம் யாக்கைக்(கு), அருந்திய(து),
அற்றது, போற்றி உணின்.
“மருந்து”என, வேண்டாம், உணவு
முழுதும் செரித்தபின் உண்டால்.
- அற்[று]ஆல் அள(வு)அறிந்(து) உண்க; அஃ(து)உடம்பு
பெற்றான், நெடி(து)உய்க்கும் ஆறு.
நீடுவாழ விரும்புவார், செரித்தலின்
அளவை அறிந்து உண்க.
- அற்(று),அ(து) அறிந்து, கடைப்பிடித்து, மா(று)அல்ல,
துய்க்க, துவரப் பசித்து.
செரித்ததை அறிந்து, பசித்தபின்
அவ்வகை உணவையே தொடர்க.
- மாறுபா(டு) இல்லாத உண்டி, மறுத்(து)உண்ணின்,
ஊறுபா(டு) இல்லை உயிர்க்கு.
ஒத்துக்கொள்ளாத உணவை, ஒதுக்கி
உண்பார்க்கு, எந்நோயும் இல்லை.
- இழி(வு)அறிந்(து), உண்பான்கண் இன்பம்போல் நிற்கும்,
கழிபேர் இரையான்கண் நோய்.
செரித்தபின், உண்பார்க்கு இன்பம்;
பெரும்தீனியார்க்கு, நோயின் துன்பம்.
- தீஅள(வு) இன்றித் தெரியான், பெரி(து)உண்ணின்,
நோய்அள(வு) இன்றிப் படும்.
செரிப்புத்திறன் தெரியாது, நிரம்ப
உண்டால், நோய்களும் நிரம்பும்.
- நோய்நாடி, நோய்முதல் நாடி, அதுதணிக்கும்
வாய்நாடி, வாய்ப்பச் செயல்.
நோய்,காரணம், தீர்க்கும்வழி ஆழ
ஆராய்ந்து, மருத்துவம் மேற்கொள்க.
- உற்றான் அளவும், பிணிஅளவும், காலமும்,
கற்றான் கருதிச் செயல்.
நோயர்நிலை, நோய்அளவு, காலம்,
ஆராய்ந்து மருத்துவம் மேற்கொள்க.
- உற்றவன், தீர்ப்பான், மருந்(து),உழைச் செல்வான்என்(று),
அப்பால்நால் கூற்றே மருந்து.
மருத்துவக் கூறுகள்: நோயர்,
மருத்துவர், மருந்து, உதவுநர்.
பேரா.வெ.அரங்கராசன்
(அதிகாரம் 096 குடிமை)
Leave a Reply