திருக்குறள் அறுசொல் உரை – வெ. அரங்கராசன்: 035. துறவு
(அதிகாரம் 034. நிலையாமை தொடர்ச்சி)
01.அறத்துப் பால்
03.துறவற இயல்
அதிகாரம் 035. துறவு
ஆசைகளை எல்லாம் அகற்றிவிட்டு
வாழும், தூயநல் அறவாழ்வு.
- யாதனின், யாதனின், நீங்கியான் நோதல்,
அதனின், அதனின், இலன்.
எவ்எவற்றின் பற்றுகளை விடுகிறாரோ,
அவ்அவற்றால் துன்பங்கள் இல்லை.
- வேண்டின்உண் டாகத் துறக்க; துறந்தபின்,
ஈண்(டு)இயற் பால பல.
உயர்மதிப்பு வேண்டித் துறப்பார்க்குச்,
சமுதாயக் கடைமைகள் பற்பல.
- அடல்வேண்டும் ஐந்தன் புலத்தை; விடல்வேண்டும்,
வேண்டிய எல்லாம் ஒருங்கு.
ஐம்புலன்களை அடக்கு; விடவேண்டிய
அனைத்தையும் முழுதும் விடு.
- இயல்(பு)ஆகும், நோன்பிற்(கு)ஒன்(று) இன்மை; உடைமை,
மயல்ஆகும் மற்றும் பெயர்த்து.
ஆசைகள் இல்லாமையே துறவு;
இருந்தால், மயக்க உறவு.
- மற்றும் தொடர்ப்பா(டு) எவன்கொலோ? பிறப்(பு)அறுக்கல்
உற்றார்க்(கு), உடம்பும் மிகை.
பிறவித்துயர் போக்குவார்க்[கு], உடலும்
சுமைதான்; மற்றவை எதற்கு?
- “யான்,என(து)” என்னும், செருக்(கு)அறுப்பான், வானோர்க்(கு)
உயர்ந்த உலகம் புகும்.
“நான்,எனது” என்னும், ஆணவம்இல்லான்,
உயர்வான் உலகு புகுவான்.
- பற்றி விடாஅ இடும்பைகள், பற்றினைப்
பற்றி விடாஅ தவர்க்கு.
பற்றுகளை விடாதாரைத் துன்பங்களும்
பற்றும்; பற்றி விடாவாம்.
- தலைப்பட்டார், தீரத் துறந்தார்; மயங்கி
வலைப்பட்டார், மற்றை யவர்.
முழுதும் துறந்தார் துறவில்
தலைமையார்; மற்றையார் மயங்குவார்.
- பற்(று)அற்ற கண்ணே, பிறப்(பு)அறுக்கும்; மற்று,
நிலையாமை காணப் படும்.
பற்றுஇலார்க்கு இல்லை பிறப்பு;
பற்றுஉளார்க்குப் பிறப்பு பிறக்கும்.
- பற்றுக, பற்(று)அற்றான் பற்றினை, அப்பற்றைப்
பற்றுக, பற்று விடற்கு.
பற்றுகளை விடற்குப், பற்றுஇல்லார்
பற்றினைப் பற்றுஎனப் பற்று.
-பேராசிரியர் வெ. அரங்கராசன்
Leave a Reply