திருக்குறள் அறுசொல் உரை – வெ. அரங்கராசன்: 033. கொல்லாமை
(அதிகாரம் 032. இன்னா செய்யாமை தொடர்ச்சி)
01. அறத்துப் பால்
03.துறவற இயல்
அதிகாரம் 033. கொல்லாமை
எவ்உயிரையும் கொல்லாது, எல்லா
உயிர்களையும் காப்பாற்றும் கொள்கை
- அறவினை யா(து)?எனின், கொல்லாமை; கோறல்,
பிறவினை எல்லாம் தரும்.
கொல்லாமையே அறச்செயல்; கொல்லுதல்,
எல்லாத் தீமைகளையும் நல்கும்.
- பகுத்(து)உண்டு, பல்உயிர் ஓம்புதல், நூலோர்
தொகுத்தவற்றுள் எல்லாம் தலை.
பகுத்[து]உண்டு, பல்உயிர்களைக் காத்தல்,
அறங்களுள் தலைமை அறம்.
- ஒன்(று)ஆக நல்லது, கொல்லாமை; மற்(று),அதன்
பின்சாரப், பொய்யாமை நன்று.
மொத்தத்தில் நல்அறம் கொல்லாமை;
பொய்த்தல் இல்லாமல் பின்பற்றுக.
- நல்ஆ(று) எனப்படுவ(து) யா(து)?எனின், யா(து)ஒன்றும்,
கொல்லாமை சூழும் நெறி.
எவ்உயிரையும், கொல்லாது வாழ்தற்கு
எண்ணுதலே நல்ல அறவழி.
- நிலைஅஞ்சி நீத்தாருள் எல்லாம், கொலைஅஞ்சிக்,
கொல்லாமை சூழ்வான் தலை.
துறந்தாருள் உயிர்க்கொலைக்[கு] அஞ்சித்
துறந்தார் தலைமைத் துறவி.
- கொல்லாமை மேற்கொண்(டு) ஒழுகுவான் வாழ்நாள்மேல்,
செல்லா(து), உயிர்உண்ணும் கூற்று.
கொல்லாமைத் தவத்தைப் பின்பற்றுவாரை
உயிர்உண்ணும் எமனும் நெருங்கான்.
- தன்உயிர் நீப்பினும், செய்யற்க, தான்,பிறி[து]
இன்உயிர் நீக்கும் வினை.
தன்உயிர் நீங்குநிலையிலும், மற்ற
இன்உயிரை நீக்கக் கூடாது.
- நன்(று)ஆகும் ஆக்கம், பெரி(து)எனினும், சான்றோர்க்குக்,
கொன்(று)ஆகும் ஆக்கம் கடை.
‘கொலையால் வருவளநலம் இழிவு’
என்றே உயர்ந்தார் எண்ணுவார்.
- கொலைவினையர் ஆகிய மாக்கள், புலைவினையர்,
புன்மை தெரிவார் அகத்து.
இழிவினை ஆராயும் பெரியார்க்குக்,
கொலைஞரும் இழிஞரே ஆவார்.
- “உயிர்உடம்பின் நீக்கியார்” என்ப, செயிர்உடம்பின்,
செல்லாத்தீ வாழ்க்கை யவர்.
உயிர்க்கொலை செய்வார், குற்றமும்,
துயரும் நீங்காத இழிவாழ்க்கையார்.
-பேராசிரியர் வெ. அரங்கராசன்
Leave a Reply