வள்ளலார் வழியே வாழ்விற்கறம் ! - புலவர் பழ.தமிழாளன்

வள்ளலார் வழியே வாழ்விற்கறம் !

அருட்பே ரொளியே இறையெனக்

கொண்ட அருளகத்தார் /

உருவ வழிபா டொழித்தசீர் ஒப்பில்

ஒளிமுகத்தர் /

கருவில் திருவினைக் கையகம்

பெற்ற கலைநிறைஞர் /

அருட்பா படைத்தே அதன்வழி வாவென்

(று) அழைத்தனரே ! /

சாதி சமயச் சழக்கை ஒழித்துச்

சமமெனவே /

ஓதியும் மக்களை ஒன்று படுத்திய

ஒண்மையராம் /

வேதியர் கூற்றை விலக்கியே வாழ்ந்த

நல் வள்ளலவர் /

ஏதிலார் கண்டே இரக்க மழையை

இறைத்தவரே ! /

வாடு பயிரினைக் கண்டபோ தெல்லாமே

வாடியவர் /

கூடும் உடலில் உயிரையே காக்க

உணவளித்து /

வாடு வறுமைத்தீ வையகம் ஓட்டியே

வைத்ததொடு /

நாடுவாழ் மக்கள் நலமுறப் பாஅருள்

நல்கினரே ! /

பாடும் அருட்பாவும் பாமருள் என்று

பகன்றவரைக் /

கூடு முறைமன்றில் கண்டே தொழுந்திடு

தோற்றமவர் /

ஏடு முறைவழித் தீர்க்கும் நடுவர்

எழுந்தனரேல் /

பாடு தமிழ்பாவே பண்பார் அருட்பாப்

படையலதே ! /

வள்ளல் பெருமான் வழியறம் பற்றியே

வையகத்தார் /

தள்ளாதே ஒன்றித் தடவழிச் செல்லின்

தலைமுறையின்/

உள்ளம் அறவுணர் ஓங்கி மலரும்

உலகமதில் /

கள்ளத் தனமுமே காருறை பாரில்

களைந்திடுமே ! /

புலவர் பழ.தமிழாளன்,

இயக்குநர்—பைந்தமிழியக்கம், திருச்சிராப்பள்ளி

வள்ளலார் வழியே வாழ்விற்கறம் ! – புலவர் பழ.தமிழாளன்