மொழிமானக் காவலர் தமிழமல்லன் – மு.பாலசுப்பிரமணியன்
மொழிமானக் காவலர் தமிழமல்லன்
தமிழுணர்வு குன்றாத தகையாளர்
தன்மானம் நின்றோங்கும் நெறியாளர்
உமியாக அயற்சொற்கள் கலப்பதையே
உரக்க எதிர்க்கின்ற வீராளர்
மல்லனுடை பாக்கள் என்றால்
அனல்பறக்கும்
நல்லொழுக்கம் கருத்துவளம்
அணிவகுக்கும்
கன்னலென தேன்பாக்கள்
கரும்பினிக்கும்
நன்னெறியில் பிறழ்வோரை
சுட்டெரிக்கும்
மின்சாரம் பாய்ந்ததுபோல்
வீச்சிருக்கும்
தென்னிலங்கை மண்பெருமை
மூச்சிருக்கும்
மண்மானம் மொழிமானம்
காத்திருக்கும்
எதுகையும் மோனையும்
எழுந்துநிற்கும்
எழுதென்று உவமையெலாம்
ஏங்கிநிற்கும்
தொடைவந்து தோள்சாய்ந்து
காத்திருக்கும்
தோதான இடம்கேட்டு
பார்த்திருக்கும்
படையெடுத்துச் சொல்லெலாம்
படியிருக்கும்
மடைதிறந்த வெள்ளம்போல்
கவிசிறக்கும்
பாவேந்தர் புகழ்பரப்பும் பண்பாளர்
பாடாற்றி தமிழ்காக்கும் அன்பாளர்
தூவலிலே துளிகலப்பும் இல்லாமல்
தூயதமிழ் வளர்க்கின்ற தாளாளர்
பகுத்தறிவு பரப்பிடுவார் இதழ்வழியே
பண்ணித்தமிழ் ஏசிடுவார் உரையினிலே
வகுத்தநெறி வழுவாமல் நடந்திடுவார்
வாய்திறந்தால் தமிழொன்றே பேசிடுவார்
முழக்கம்
முழக்கம் கையில் நான்பெற்றேன்
முழுதாயப் படித்துத் தெம்புற்றேன்
வழக்காய் செய்யுள் செய்யாமல்
வரம்பை உடைத்த கவிகற்றேன்
இழுக்கை இகழ்ந்த திறம்கண்டேன்
ஈழம் போற்றும் விதம் கண்டேன்
எழுச்சி பொங்கும் பாக்களிலே
எள்ளல் துள்ளல் யான்கண்டேன்
தனித்தமிழே பாக்களிலே மிளிர்கிறது
தன்மானம் ஒன்றேதான் ஒளிர்கிறது
கனிச்சுவையாய்ப் பாட்டுவளம் இனிக்கிறது
கயமைகளைத் தீயிட்டு எரிக்கிறது
நடப்புகளை நன்றாக ஆய்கிறது
நரித்தனத்தை வீரோடு எதிர்க்கிறது
இடமறிந்து கொள்கைகளை விதைக்கிறது
இன்பத்தமிழ் சிறந்திடவே எழுகிறது
கையில் மல்லன் பாட்டோடு
காணும் இளைஞர் கூட்டத்தை
மெய்யாய்க் காண்போம் பின்னாளில்
மேன்மை எய்தும் தமிழினமே
ஐயா வாழ்க நீடூழி!
அடுத்தும் படைப்பீர் பலநூல்கள்
கையைக் கூப்பி வாழ்த்துகிறேன்
கன்னித் தமிழ்போல் வாழ்ந்திடுக!
மு.பாலசுப்பிரமணியன்
செயலர்,
புதுவைத் தமிழ்ச் சங்கம்
Leave a Reply