திருக்குறள் அறுசொல் உரை – 071. குறிப்பு அறிதல் : வெ. அரங்கராசன்
(அதிகாரம் 070. மன்னரைச் சேர்ந்து ஒழுகல் தொடர்ச்சி)
02. பொருள் பால்
06. அமைச்சு இயல்
அதிகாரம் 071. குறிப்பு அறிதல்
பிறரது மனஉணர்வுகளைக் கண்கள்,
முகங்கள்வழி ஆராய்ந்து அறிதல்.
- கூறாமைநோக்கிக் குறிப்(பு) அறிவான், எஞ்ஞான்றும்,
மாறாநீர் வையக்(கு) அணி.
முகக்குறிப்பால் மனஉணர்வை அறிவார்
உலகிற்கே நல்நகை ஆவார்.
- ஐயப் படாஅ(து), அகத்த(து) உணர்வானைத்,
தெய்வத்தோ(டு) ஒப்பக் கொளல்.
மனத்தின் உள்கருத்தை ஐயம்அற,
உணர்வார் தெய்வத்திற்குச் சமம்.
- குறிப்பின் குறிப்(பு)உணர் வாரை, உறுப்பினுள்,
யாது கொடுத்தும் கொளல்.
உள்கருத்தைக் குறிப்பால் உணர்வார்க்கு,
நாட்டுஉறுப்பைக் கொடுத்தும் சேர்க்க.
- குறித்தது, கூறாமைக் கொள்வாரோ(டு), ஏனை
உறுப்போர் அனையரால் வேறு.
குறிப்புஉணர்வார், உணர முடியாதார்
உடலால் மட்டும் சமம்.
- குறிப்பின் குறிப்(பு)உணரா ஆயின், உறுப்பினுள்
என்ன பயத்ததோ கண்?
முகக்குறிப்பால் மனக்கருத்தை உணரார்க்குக்,
கண்களால் என்ன பயனோ?
- அடுத்தது காட்டும் பளிங்குபோல், நெஞ்சம்
கடுத்தது காட்டும் முகம்.
பொருளைக் காட்டும் கண்ணாடி;
மனஉணர்வை முகம்காட்டும் முன்னாடி.
- முகத்தின் முதுக்குறைந்த(து) உண்டோ? உவப்பினும்,
காயினும், தான்முந்(து) உறும்.
விருப்பும், வெறுப்பும் முந்திக்காட்டும்
முகம்போல் வேறுஒன்று உண்டோ?
- முகம்நோக்கி நிற்க அமையும், அகம்நோக்கி,
உற்ற(து) உணர்வார்ப் பெறின்.
முகத்தை நுண்ஆய்ந்து, மனத்துள்
உள்ளதைக் குறிப்புணர்வார், உணர்வார்.
- பகைமையும், கேண்மையும், கண்உரைக்கும்; கண்ணின்
வகைமை உணர்வார்ப் பெறின்.
கண்பார்வையின் வகைகள் உணர்வார்,
கண்வழி பகைநட்பு உணர்வார்.
- “நுண்ணியம்” என்பார் அளக்கும்கோல், காணும்கால்,
கண்அல்ல(து) இல்லை பிற.
“குறிப்புஉணர்வில் நுண்அறிவு பெற்றுளோம்”
என்பார்க்குக், கண்ணே அளவுகோல்.
-பேராசிரியர் வெ. அரங்கராசன்
Leave a Reply